गजल
हिरख कुसै ने जाई लांदे
अस बी अपना चा चकांदे।
साढ़ा बी कोई संगी होंदा
जिसगी अपना हाल सनांदे।
कोई ते बेला खुशी दा औंदा
अस बी हस्सदे, नच्चदे, गांदे।
सुखने साढ़े, साढ़े आंह्गर
थक्के, हुट्टे, मांदे-मांदे।
बोरी-बोरी होरें गी ते
दया गी दे मुट्ठें पतेआंदे।
गजल
इस धरती दे जाए दिक्खो
अपने होए पराए दिक्खो।
ओह् मेरे फुल्लें दे बदले
कंडे लेईयै आए दिक्खो।
कर्जे जेह्डे बगाने सर हे
ओह् वी असें चकाए दिक्खो।
भेती बनिए कोई दया गी
गुज्झी सट्ट कराए दिक्खो।
गजल
तुंदा मंदा लगदा रौंह्दां
अक्खी पानी बगदा रौंह्दां।
आऊं ते फ्ही बी सेई जन्ना
दर्द मनं दा जगता रौंह्दां।
हर कोई तुंदी आड़ै चे
मिगी बराबर ठगदा रौंह्दां।
जीवन कदें नी ठैहरी सकदा
नाडू सांई बगदा रौंह्दां।
लोक नी करदे शर्म कुसै दी
दया एह् फ्ही बी चक्कदा रौंह्दां।
गजल
चेते भुल्ले, भुल्ले चेते
पे सारे गे चुल्हे चेते।
अक्खीं सांभी-सांभी रक्खे
अत्थरू बनिए डुल्ले चेते।
चेते झुल्ले पत्तर पत्तर
पत्तर पत्तर झुल्ले चेते।
केईयें किस्मं दे न हुंदे
होले, भारे, पुल्ल चेते।
गजल
छम-छम-छम-छम आई बरखा
चौंने पासै छाई बरखा।
बिंद कुतै नीं बरेआ पानी
बदलें ने पतेआई बरखा।
कंढिया सुक्का पोआ करदा
देओ बिंद बराई बरखा।
एह् केह् समझै प्यास कुसै दी
आंपू ऐ तरेआई बरखा।
बिन तेरे केह् सोह् न द म्हीना
रास दनां नीं आई बरखा।
जन्में दे तरेआए दया नैं
छाती कन्नै लाई बरखा।
--- दया राम दया, कबि
पता - टिक्करी खन्नी, संग्रामपुर जम्मू
मोबाइल - 0-94-19129638
0 comments:
एक टिप्पणी भेजें